1Sa 3 | CopSahBible2 | STEP | ⲁⲩⲱ ⲡϣⲏⲣⲉ ϣⲏⲙ ⲥⲁⲙⲟⲩⲏⲗ ⲛⲉϥϣⲙϣⲉ ⲙⲡϫⲟⲉⲓⲥ ⲙⲡⲉⲙⲧⲟ ⲉⲃⲟⲗ ⲛϩⲏⲗⲓ ⲡⲟⲩⲏⲏⲃ ⲁⲩⲱ ⲡϣⲁϫⲉ ⲙⲡϫⲟⲉⲓⲥ ⲛⲉϥⲧⲁⲓⲏⲩ ϩⲛ ⲛⲉϩⲟⲟⲩ ⲉⲧⲙⲙⲁⲩ ⲉⲙⲛϩⲟⲣⲁⲥⲓⲥ ⲡⲟⲣϫ ⲉⲃⲟⲗ

1 Samuel 3

1 ⲁⲩⲱ ⲡϣⲏⲣⲉ ϣⲏⲙ ⲥⲁⲙⲟⲩⲏⲗ ⲛⲉϥϣⲙϣⲉ ⲙⲡϫⲟⲉⲓⲥ ⲙⲡⲉⲙⲧⲟ ⲉⲃⲟⲗ ⲛϩⲏⲗⲓ ⲡⲟⲩⲏⲏⲃ ⲁⲩⲱ ⲡϣⲁϫⲉ ⲙⲡϫⲟⲉⲓⲥ ⲛⲉϥⲧⲁⲓⲏⲩ ϩⲛ ⲛⲉϩⲟⲟⲩ ⲉⲧⲙⲙⲁⲩ ⲉⲙⲛϩⲟⲣⲁⲥⲓⲥ ⲡⲟⲣϫ ⲉⲃⲟⲗ 2 ⲁⲥϣⲱⲡⲉ ⲇⲉ ⲛⲛⲉϩⲟⲟⲩ ⲉⲧⲙⲙⲁⲩ ϩⲏⲗⲓ ⲛⲉϥⲉⲛⲕⲟⲧⲕ ϩⲙ ⲡⲉϥⲙⲁ ⲁⲩⲱ ⲛⲉϥⲃⲁⲗ ⲁⲩϫⲱⲛⲧ ⲉϩⲣⲟϣ ⲉⲣⲟϥ ⲉⲙⲉϥⲉϣⲉⲓⲱⲣϩ 3 ⲁⲩⲱ ⲡϩⲏⲃⲥ ⲙⲡⲛⲟⲩⲧⲉ ⲙⲡⲁⲧⲟⲩϭⲟⲣϭϥ ⲥⲁⲙⲟⲩⲏⲗ ⲛⲉϥⲛⲕⲟⲧⲕ ϩⲙ ⲡⲉⲣⲡⲉ ϩⲙ ⲡⲙⲁ ⲉⲧⲉⲣⲉⲧⲕⲓⲃⲱⲧⲟⲥ ⲙⲡⲛⲟⲩⲧⲉ ⲛϩⲏⲧϥ 4 ⲁⲩⲱ ⲡϫⲟⲉⲓⲥ ⲁϥⲙⲟⲩⲧⲉ ⲉⲥⲁⲙⲟⲩⲏⲗ ⲉϥϫⲱ ⲙⲙⲟⲥ ϫⲉ ⲥⲁⲙⲟⲩⲏⲗ ⲥⲁⲙⲟⲩⲏⲗ ⲡⲉϫⲁϥ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ⲁⲓⲉⲓ 5 ⲁⲩⲱ ⲁϥⲡⲱⲧ ⲉⲣⲁⲧϥ ⲛϩⲏⲗⲓ ⲉϥϫⲱ ⲙⲙⲟⲥ ⲛⲁϥ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ⲁⲓⲉⲓ ϫⲉ ⲁⲕⲙⲟⲩⲧⲉ ⲉⲣⲟⲓ ⲡⲉϫⲉϩⲏⲗⲓ ⲛⲁϥ ϫⲉ ⲙⲡⲓⲙⲟⲩⲧⲉ ⲉⲣⲟⲕ ⲃⲱⲕ ⲛⲅⲛⲕⲟⲧⲕ ⲁϥⲕⲧⲟϥ ⲁϥⲃⲱⲕ ⲁϥⲛⲕⲟⲧⲕ 6 ⲡϫⲟⲉⲓⲥ ⲇⲉ ⲁϥⲟⲩⲱϩ ⲉⲧⲟⲟⲧϥ ⲛⲕⲉⲥⲟⲡ ⲉⲙⲟⲩⲧⲉ ϫⲉ ⲥⲁⲙⲟⲩⲏⲗ ⲥⲁⲙⲟⲩⲏⲗ ⲁϥⲡⲱⲧ ⲟⲛ ⲉⲣⲁⲧϥ ⲛϩⲏⲗⲓ ⲙⲡⲙⲉϩⲥⲉⲡ ⲥⲛⲁⲩ ⲉϥϫⲱ ⲙⲙⲟⲥ ⲛⲁϥ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ⲁⲓⲉⲓ ϫⲉ ⲁⲕⲙⲟⲩⲧⲉ ⲉⲣⲟⲓ ⲡⲉϫⲉϩⲏⲗⲓ ⲛⲁϥ ϫⲉ ⲙⲡⲓⲙⲟⲩⲧⲉ ⲉⲣⲟⲕ ⲃⲱⲕ ⲛⲅⲉⲛⲕⲟⲧⲕ 7 ⲁⲩⲱ ⲥⲁⲙⲟⲩⲏⲗ ⲙⲡⲁⲧⲉϥⲥⲟⲩⲉⲛⲡⲛⲟⲩⲧⲉ ⲁⲩⲱ ⲙⲡⲉⲡϣⲁϫⲉ ⲙⲡϫⲟⲉⲓⲥ ϭⲱⲗⲡ ⲉⲣⲟϥ 8 ⲁⲡϫⲟⲉⲓⲥ ⲟⲩⲱϩ ⲉⲧⲟⲟⲧϥ ⲉⲙⲟⲩⲧⲉ ⲙⲡⲙⲉϩϣⲟⲙⲛⲧ ⲛⲥⲟⲡ ⲉⲥⲁⲙⲟⲩⲏⲗ ⲉϥϫⲱ ⲙⲙⲟⲥ ϫⲉ ⲥⲁⲙⲟⲩⲏⲗ ⲁϥⲧⲱⲟⲩⲛ ⲟⲛ ⲁϥⲡⲱⲧ ⲉⲣⲁⲧϥ ⲛϩⲏⲗⲓ ⲉϥϫⲱ ⲙⲙⲟⲥ ⲛⲁϥ ϫⲉ ⲉⲓⲥ ϩⲏⲏⲧⲉ ⲁⲓⲉⲓ ϫⲉ ⲕⲙⲟⲩⲧⲉ ⲉⲣⲟⲓ ⲁⲩⲱ ϩⲏⲗⲓ ⲁϥⲉⲓⲙⲉ ϫⲉ ⲡϫⲟⲉⲓⲥ ⲡⲉ ⲛⲧⲁϥⲙⲟⲩⲧⲉ ⲉⲡϣⲏⲣⲉ ϣⲏⲙ 9 ⲁⲩⲱ ⲡⲉϫⲉϩⲏⲗⲓ ⲛⲁϥ ϫⲉ ⲕⲟⲧⲕ ⲛⲅⲛⲕⲟⲧⲕ ⲡⲁϣⲏⲣⲉ ⲁⲩⲱ ⲉϥϣⲁⲛⲙⲟⲩⲧⲉ ⲉⲣⲟⲕ ⲉⲕⲉϫⲟⲟⲥ ϫⲉ ⲡϫⲟⲉⲓⲥ ϣⲁϫⲉ ⲡⲉⲕϩⲙϩⲁⲗ ⲥⲱⲧⲙ ⲥⲁⲙⲟⲩⲏⲗ ⲇⲉ ⲁϥⲃⲱⲕ ⲁϥⲛⲕⲟⲧⲕ ϩⲙ ⲡⲉϥⲙⲁ 10 ⲁⲩⲱ ⲡϫⲟⲉⲓⲥ ⲁϥⲉⲓ ϩⲁϫⲱϥ ⲁϥⲙⲟⲩⲧⲉ ⲉⲣⲟϥ ⲛⲑⲉ ⲛⲧⲉϩⲟⲩⲉⲓⲧⲉ ⲡⲉϫⲉⲥⲁⲙⲟⲩⲏⲗ ϫⲉ ϣⲁϫⲉ ⲡⲉⲕϩⲙϩⲁⲗ ⲥⲱⲧⲙ ⲉⲣⲟⲕ 11 ⲡⲉϫⲉⲡϫⲟⲉⲓⲥ ⲛⲥⲁⲙⲟⲩⲏⲗ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ϯⲛⲁⲉⲓⲣⲉ ⲛⲛⲁϣⲁϫⲉ ϩⲙ ⲡⲓ︤ⲏ︦ⲗ︥ ϫⲉⲕⲁⲥ ⲟⲩⲟⲛ ⲛⲓⲙ ⲉⲧⲛⲁⲥⲱⲧⲙ ⲉⲣⲟⲟⲩ ⲛⲧⲉⲛⲉϥⲙⲁⲁϫⲉ ⲙⲟⲩⲧⲉ ⲉⲃⲟⲗ 12 ϩⲙ ⲡⲉϩⲟⲟⲩ ⲉⲧⲙⲙⲁⲩ ϯⲛⲁⲉⲓⲛⲉ ⲉϫⲛ ϩⲏⲗⲓ ⲛϣⲁϫⲉ ⲛⲓⲙ ⲛⲧⲁⲓⲧⲁⲩⲟⲟⲩ ⲉϫⲙ ⲡⲉϥⲏⲓ ϯⲛⲁϩⲓⲧⲟⲟⲧ ⲉⲁⲁⲩ ⲛⲧⲁϫⲟⲕⲟⲩ ⲉⲃⲟⲗ 13 ⲁⲩⲱ ⲁⲓⲧⲁⲙⲟϥ ϫⲉ ϯⲛⲁϫⲓⲕⲃⲁ ⲁⲛⲟⲕ ϩⲙ ⲡⲉϥⲏⲓ ⲛϣⲁ ⲉⲛⲉϩ ϩⲛ ⲛⲉϫⲓⲛϭⲟⲛⲥ ⲛⲛⲉϥϣⲏⲣⲉ ϫⲉ ⲛⲉϥϣⲏⲣⲉ ⲛⲉⲩϫⲉ ⲡⲉⲑⲟⲟⲩ ⲛⲥⲁ ⲡⲛⲟⲩⲧⲉ ⲁⲩⲱ ⲛⲉϥϯⲥⲃⲱ ⲛⲁⲩ ⲁⲛ ⲡⲉ 14 ⲁⲩⲱ ⲛⲛⲉⲧⲉⲓϩⲉ ϣⲱⲡⲉ ⲁⲓⲱⲣⲕ ⲉϫⲙ ⲡⲏⲓ ⲛϩⲏⲗⲓ ϫⲉ ⲉϣⲱⲡⲉ ⲥⲉⲛⲁⲕⲱ ⲉⲃⲟⲗ ⲙⲡϫⲓⲛϭⲟⲛⲥ ⲙⲡⲏⲓ ⲛϩⲏⲗⲓ ϩⲛ ⲟⲩϣⲟⲩϩⲏⲛⲉ ⲁⲩⲱ ϩⲛ ϩⲉⲛⲑⲩⲥⲓⲁ ⲛϣⲁ ⲉⲛⲉϩ 15 ⲥⲁⲙⲟⲩⲏⲗ ⲇⲉ ⲁϥⲛⲕⲟⲧⲕ ϣⲁ ϩⲧⲟⲟⲩⲉ ⲁⲩⲱ ⲁϥϣⲟⲣⲡϥ ⲙⲡⲉϥϩⲧⲟⲟⲩⲉ ⲁϥⲟⲩⲱⲛ ⲛⲛⲉⲣⲟ ⲙⲡⲏⲓ ⲙⲡϫⲟⲉⲓⲥ ⲥⲁⲙⲟⲩⲏⲗ ⲇⲉ ⲁϥⲣϩⲟⲧⲉ ⲉⲧⲁⲩⲉⲑⲟⲣⲁⲥⲓⲥ ⲉϩⲏⲗⲓ 16 ⲡⲉϫⲉϩⲏⲗⲓ ⲉϩⲟⲩⲛ ϩⲛ ⲥⲁⲙⲟⲩⲏⲗ ϫⲉ ⲥⲁⲙⲟⲩⲏⲗ ⲡⲁϣⲏⲣⲉ ⲡⲉϫⲁϥ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ϯⲥⲱⲧⲙ 17 ⲡⲉϫⲉϩⲏⲗⲓ ⲛⲁϥ ϫⲉ ⲟⲩ ⲡⲉ ⲡϣⲁϫⲉ ⲛⲧⲁⲩϫⲟⲟϥ ⲉⲣⲟⲕ ⲙⲡⲉⲣϩⲱⲡ ⲉⲣⲟⲓ ⲉⲣⲉⲡⲛⲟⲩⲧⲉ ⲉⲓⲣⲉ ⲛⲁⲕ ⲉⲕϣⲁⲛϩⲉⲡⲟⲩϣⲁϫⲉ ⲉⲣⲟⲓ ⲉⲃⲟⲗ ϩⲛ ⲛⲉϣⲁϫⲉ ⲧⲏⲣⲟⲩ ⲛⲧⲁⲩϫⲟⲟⲩ ⲉⲛⲉⲕⲙⲁⲁϫⲉ 18 ⲁⲩⲱ ⲥⲁⲙⲟⲩⲏⲗ ⲁϥⲧⲁⲩⲟ ⲉϩⲏⲗⲓ ⲛⲛⲉϣⲁϫⲉ ⲧⲏⲣⲟⲩ ⲙⲡⲉϥϩⲉⲡⲗⲁⲁⲩ ⲉⲣⲟϥ ⲡⲉϫⲉϩⲏⲗⲓ ϫⲉ ⲡϫⲟⲉⲓⲥ ⲉϥⲉⲉⲓⲣⲉ ⲛⲧⲟϥ ⲙⲡⲁⲅⲁⲑⲟⲛ ⲙⲡⲉϥⲙⲧⲟ ⲉⲃⲟⲗ 19 ⲥⲁⲙⲟⲩⲏⲗ ⲇⲉ ⲁϥϫⲓⲥⲉ ⲁⲩⲱ ⲡϫⲟⲉⲓⲥ ⲛⲉϥϣⲟⲟⲡ ⲛⲙⲙⲁϥ ⲉⲙⲡⲉⲗⲁⲁⲩ ϩⲛ ⲛⲉϥϣⲁϫⲉ ⲧⲏⲣⲟⲩ ϩⲉ ⲉⲃⲟⲗ ϩⲓϫⲙ ⲡⲕⲁϩ 20 ⲁⲩⲱ ⲡⲓ︤ⲏ︦ⲗ︥ ⲧⲏⲣϥ ⲁⲩⲉⲓⲙⲉ ϫⲓⲛ ⲇⲁⲛ ϣⲁ ⲃⲏⲣⲥⲁⲃⲉⲉ ϫⲉ ⲥⲁⲙⲟⲩⲏⲗ ⲟⲩⲡⲓⲥⲧⲟⲥ ⲡⲉ ⲙⲡⲣⲟⲫⲏⲧⲏⲥ ⲙⲡⲛⲟⲩⲧⲉ 21 ⲁⲩⲱ ⲡϫⲟⲉⲓⲥ ⲁϥⲟⲩⲱϩ ⲉⲧⲟⲟⲧϥ ⲉⲧⲁⲙⲟⲟⲩ ϩⲛ ⲥⲏⲗⲱⲙ ϫⲉ ⲡϫⲟⲉⲓⲥ ⲁϥⲟⲩⲟⲛϩϥ ⲉⲃⲟⲗ ⲉⲥⲁⲙⲟⲩⲏⲗ ⲁⲩⲱ ⲥⲁⲙⲟⲩⲏⲗ ⲁⲩⲧⲁⲛϩⲟⲩⲧϥ ⲉⲧⲣⲉϥⲉⲣⲡⲣⲟⲫⲏⲧⲏⲥ ⲙⲡϫⲟⲉⲓⲥ ⲉⲡⲓ︤ⲏ︦ⲗ︥ ⲧⲏⲣϥ ⲛϫⲓⲛ ϫⲱϥ ⲙⲡⲕⲁϩ ϣⲁ ϫⲱϥ ⲁⲩⲱ ϩⲏⲗⲓ ⲛⲉⲩϩⲗⲗⲟ ⲉⲙⲁⲧⲉ ⲡⲉ ⲁⲩⲱ ⲛⲉϥϣⲏⲣⲉ ⲛⲉⲩⲙⲟⲟϣⲉ ϩⲓⲛⲁⲓ ⲡⲉ ⲉⲣⲉⲧⲉⲩϩⲓⲏ ϩⲟⲟⲩ